YAKOTINENYOYA'KS
Listen here in Real Audio

Wahonnise skahwatsira Onkwehonwe ronne'skwe', tyotkon ronatonnhahere. Kiken ne Ronwa'niha ratoratsheraweyenhon, yah nonwenton tehontonhkarya'ks ne raohwatsire. Kiken ne Shakoti'nihstenha yeweyenniyo yakokhonnyatskon, tanon tyotkon yonhkwennyonni raonawe'nkhson'a, kanehon tanon orwhare yontstha', ne oni yakonnya'tha' ne raonahsirehson'a.

Kayeri nihotiwirayen. Tsyeya'tat ne ihsi nonwe niyako'nikonhratshani, Katsi'tsyaro'roks yontatyats. Ne'e ki' akwah yakaonwehskwanih kanyatarakta ayontyen', tyotkon niya'tekon yonnonhtonnyonkwas ne karihwiyos ne aontawe' ne akaohwatsirakon.

Ya'akotahwe' se' ken'en nonwa. Akoserehtakon yakothonte rotihthare. Ya'eyehtahkwe Tayonnitskoten', ken' na'eyere' kenh ronne' Yakotinenyoya'ks, ken' ok nihonna's, Yatathrona tanon ahsen nihotiwirayen. Akwah se' ken'en kenh iken Owira'a karhonkhsera'k roya'tanentakon.

Katsi'tsyaro'roks O'nihstenh yotkate ronwatikaratonnis n Ronwatiyen'okonha ne Yakotinenyoya'ks. "Tohsa yetshitshanik, yetshihtharhahs tohsa tayetshiya'tetyahtikhon' enyetshyaterahshon Ne kati wa'akehyarane' tsi naho'ten yakawenh ne O'nihstenha. Yah ki' tetyakoton'nekonh."

Yahonwatihtharhahse', wa'iron', "Kats, kenh sewatyen,, tanon sewatorihshen. Sewatonhkarya'ks ken. Kana'ataronkhonwe, tanon sewahyowane wak:yen. Kenh isewak. " tanon wahonwatihnekanonte. Wa'iron', "Ka'nonwe isewenteron Wahniron' ne Yatathrona, 'A'eren onontohartike. Wabshakotihonkaron' ayenatara' tsi nonwe thafiteron'. Wa'onthontate'."

click image to enlarge

Sahonne' tsi sahonhtenti', yahonnewe' tsi tkentste'nrote. Kenh iken Yakonenyoyaks rahsnonhsa'ke wahonitskeronti', tanon kentstenhra'ke waharanye'. Thontayawenhstsi ken' niwa' tsi wa'tewateronwentate . Yonsahontaweya'te' raotinonhsakon ne raohwatsire Wa'iron', Yah thaonton' yakataweyate sotsi ken' niwa'ah tsi yontaweya'tahkwa."

"Tohske wahi, " wahenron' ne Yakonenyoya'ks. "Sonke'nikonrhen' tsi skowanen nise. Akohenton wa'thatane', tanon rahsnonhsa'ke wahonitskeronti, yenonts'ine' wahayena'. Thontayawenhstsi wa'onhstho'ne' tsi niyore ehto ok nitsyaka" tsi niyoht ne ronatya'ke. Onen onton' ya'ontaweya'te'.

Kenh iken raotinonhsakon ken' ok niwa' atekhwa'ra', ennitskwa'ra', kanaktahson'a kake'ron, tanon karihstote. Etho kana'tsyahere karihsta'ke ono'ntara. Wa'ontathonkaron' Katsi'tsyaro'roks tahontonte. Wa'enon'tararonnyon' ne Yakonkwe yakorakwenh, yakorakwenh, tanon yah tetiwaterakwas ne ono'ntara. Yotena'tsyatkon.

Onen ya'kahewe' ne Katsi'tsyaro'roks aonsayonhtenti', etho yonsayontoroke' teyonitstenhrakhahsyon. Ok etho roya'ten'tonne' ne Ronkwe ken' nihra'a, sahonitskeronti' rahsnonhsake,tanon yenontsine yahayena Thontayawenhstsi sayontehyaron' tsi nitsyakahskwe'. Wahenron ne Yakonenyoya'ks, "Enhskerharatsten' tsi yah onhka tahshehro wahskwaken tanon tsi wahskwatho' tsi nonwe yakwe'nteron.

Eso shekon sayenata'ra' tsi niwakennhehs Kanenna'ke'ne onwe' , ya'kahewe' ne Katsi'tsyaro'roks, tanon Akohwatsire yaonsahonhtenti' tsi nonwe thatoratstahkwa' Ronwa'niha. Sayenata'ra' shekon ne ohnakenkha' tonsahonwatinonhweraton' ne Akoterohsera.

Kenh iken Yakotinenyoya'ks wahatkahtho' tsi tyakorihwayeri' Wahenron', Ne'e tsi Seksa'tiyo, tanon yah tesathrorih tsi wahskwaken', ne'e kati enkonyon' ahsen niwahskaneksherake.

Ne kenh iken tyotyerenhton wa'erako', "Kahskaneks ne yotenatsyatkon ne onontara, ne'ne Akhwatsire tohsa nonwenton ayakwatonhkaryake', tanon onhka yakotohetstonhatye' ayakhinon'taranonte Tekenihatont, kahskaneks ne o'nikonra ne tohsa nonwenton onhka akhenikonhraksa'te' ne akarihonni ' tsi naho'ten tkewennineken's. Ahsenhatont, kahskaneks akwekon ne Onkwe enkheken' ne tsi ok naho'ten akatkahtho' ne yoyanere tohsa akherihwatshennyase'."

Wahenron ne Yakotinenyoyaks, "Akwekon Yoyanere nahoten wahserako', tsi niyenhenwe enhsonnheke' enhsatonnharake', tanon enhsatera'swiyohake'."

Etho nikakarehs.