TSI WAHYATERIYO' NE OHKWARI TANON NE TSITSHO Listen here in Real Audio

Kenh iken Tsitsho tehotst,ikahwhenhatye', thontayawenhstsi yaha'rawe' tsi nonwe nikaya'tyonni Yakohsatens yotahs. Wahanon'ke'ra' ne kenh iken Yakohsatens tsi niyore yahohtane', tanon ohstonha yonsahatenna'te

Akwah ken' niyore'a niyeshawenonh, etho Ohkwari' wa'thyaterane'. Wahenron' ne Ohkwari', "Oh nahbten na'nee tho' iken sanhohskwanhonte Wahenron' ne Tsitsho, "Yakohsatens ihsi nonkati tyotahs. Ya'kera." "Awah, " wahenron' ne kenh iken Ohkwari', "kati enhskena'tonhahse' ka' nonwe niyotahs aonton' ni'i akenon'kera'oni. "

Sok sahyahkete' tanon yonsanewe' are tsi nonwe ne Yakohsatens niyotahs. Kenh iken Ohkwari' akwah oksa. ok tahatahsawen' wahanon'kera'tsi niyore wahohkwine'.
Wahenro'n' ne Tsitsho, "Tokat nonwa yoyanere ne yaonseteniya'tenhawe ok naa tyotkon ne'e enyonkeninahskwayentake'." Wahenron' ne Ohkwari', "Oh kati ne'e nenteniyere' ne'eh niyentsiteniya'tenhawe' , tsi niyore tsi yoya'takste. " Wahenron' ne Tsitsho, "Watyesen ki'wahi, ise ki'wahi akwah iken tsi se'shatste, ise ki' wahi entehsatironten Etho niyore onen wahenron' ne Ohkwari', "Oh kati nee nenkyere' ne entkatironten'." Wahenron'ne Tsitsho, "Yah se' ne'e naho'ten tewentore. Tenkitahsoren', tanon tenktsihkwaronten' akwah iken tsi enkhnirate. Ohnaken ni nentke' entekhreke'."

Onen ne Ohkwari' waharihwano'nwene'. Ok na'a kenh iken ne Tsitsho wahenron', "Onen ki'wa'khsa', satateweyennentaonh ken nise. Onen wa'khsa'ni'i, oh naho'ten nise sarhare'."

Etho'ne onen tahahkwatase', tanon waha'nyonhsarike' ne Yakohsatens.

Akwah oksa ok tontakaten'stahtsi ne Yakohsatens, tanon onteko', etho wahoya'ten'to'nne' ne Ohkwari'. Akwah iken tsi inon, yaken, ne Ohkwari' roya'ten'to'nne' ohenton tsi niyore wa'tewatya'ke' ne raotahsa, tanon sahatotarihsi'.
Onen wahona'khwen' ne Ohkwari', tanon wahate'nikonhrihsa' tsi enhononhwarya'khon' ne Tsitsho ne onen tenshyaterane' Onen ki', yaken, wa'thatstikahwha' roya'tihsakonhatye's ne Tsitsho.

Ohna'ken ki' onen ya'tonsahyaterane are. Wahenron' ne Ohkwari', "Akwah iken tsi wahonnise shikonya'tihsakonhatye's. Onen kati entenitakwarihsi' kenh iken tsi nahbten thihskyeronnyon. Akwah onen ok kenh nonwe enkonnewenhseraryen Wahenron' ne Tsitsho, "Yah ki' ni'i othenen tekatsterihstha'. ne ok tsi niyore ki' wahi tsi tekyattihen tsi na'tetena', wene ki' wahi tsi enhske'shenni'." Wahenron' ne Tsitsho, "Kerihwano'nwe's kenh iken ni'i, ne ok tsi hanyon ki' tetsyaron tyennitsyohkonni

Etho*'ne onen wahorihwanontonhse' ne Ohkwari', "Katke kati entewateriyo'." Wahenron' ne Ohkwari', "Akwah iken tsi yokwirowanen tyokwirote onontohara'ke, etho nonwe yatentewatatken' enyorhenne' tekeni niyohwihsta'e." Ethone onen tonsahyatekhahsi' are.

Kenh iken Ohkwari' akwah oksa ok tahatahsawen' wahshakoya'taroroke' ne ronteriyos. Etho wa'thyaterane' ne Kwiskwis. Wahenron' ne Ohkwari "Akwah iken tsi satatsinahstha' tsi nihsya'tbten', tanon akwah ki'ne'ne riya'tihsakonhatye's, ne'e rateriyos. " Wahenron' ne Kwiskwis, "Akwah ki' ni'i ne'ne riya'tihsaks ne' etho nihaya't6ten', ahse'ken yah nonwenton teyonke'shennyonh. " Akwah oksa ok ne Ohkwari' sahohonkaron' ne Kwiskwis aons'ane' tsi nonwe nihyateriyohsere'.

Kenh iken Tsitsho oni ronatsherihsakonhat Akwah iken tsi inon niyehawenonh onen wa'thyaterane' ne Erhar, akwah iken tsi tehahnenhsakaron, tanon rathsino'kahtha. Wahenron' ne Tsitsho, "Wa'oyanerenne' tsi watetyaterane' kateriyohsere' enyorhenne'. " Wahenron' ne Erhar, "Ne'e ki'ni'i wakaterihonte. Yah ne'ni'i nonwenton teyonke'shennyonh." Oksa ok ki'nen' ne'e sahohonkaron'

Akwah iken tsi niyore'a niyehonenonh, sok ya'thonterane' ne Takohs. Sok wahorihwanontonhse' ahakweni' ken ahyateriyo . Wahenron' rotateweyennenta'onh. Wahenron' ne Tsitsho, "Sha'teyoht ki' wahi onen etho ya'teyakyoya'ke' tsi nonwe nitewateriyohsere'."

Onen ki' ne Ohkwari', tanon ne Kwiskwis shiyehotih akta tsi nonwe tyokwirote yokwirowanen. Wahenron' ne Ohkwari', "Kati kenh iken okwira'ke enkerathen', ok na'a enkatkahtho' ne onen enthotike'tohte'." Wahenron' ne Kwiskwis, "Khere ken'en ni'i ke'ntho enkatorihshen' tsi nonwe niyorahkwawerhon onerahte enkaterhoroke' tsi nikari'wehs entyaterharate'."

Ok na'a ki', yaken, kenh iken Ohkwari' a'eren niyore karonta'ke yehentskohare' tehatkahthonnyons. "Aki! Onen ki' tayonenhrake'tohte wahenron' ne Ohkwari', "Onen ki'ikehre' wa'teteninyohskenne'. Akwah orihwiyo tsi yonkhi'shennyonhe' tahonatatsinahstonhatye'." Wahenron' ne Kwiskwis, "Oh naho'ten karihonni. " Wahenron' ne Ohkwari', "Shaya'tat rotyarakehte', tanon ronenyohronkwenhaty (tsi nikayen ne Erhar rathsinokahtha', tanon tehahnenhsakaron), tanon shayatat ronakarakehte' (nee kiwahi nee ne Takohs ronitahsote). " Wahenron' ne Kwiskwis, "Yoyanere aonsonsenirihwahseronni' ne Tsitsho ne onen enhonnewe.

Ok na'a, yaken, tahatati' ne' e'neken thentskwahere tsi niyore etho wahonnewe', wahenron', "Akwah ikehre'ne'ayakenirako' ne aonsetewahrihwahseronni', akwah skennen ok kenhak tsi tentsitewatekhahsi'." Wahenron' ne Tsitsho, "Akwah tsi na'a ne thikawenniyo."

Onen ki', yaken', tahatati' ne Takohs wahenron', "Akwah iken ki'ni'i tsi wakenhaten' tsi yah tetewateriyohsere'." Wahenron' ne Takohs, "Ken'en ni'i naonkyerenh ne' tokat ayonkwateriyoke'." Akwah oksa ok ya'thennitsyonhkwahkwe' tsi nonwe nityotoryaneron' onerahte, tanon Kwiskwis ya'tho'nyonkwarihstha'. Tanon onen ne Kwiskwis wa'thohe'nrehte'.

Akwah oksa ok yonsahotkawahte tsi niyore tsi tahatonhneke'. Taharathen' tsi karontote tsi nonwe thentskwahere ne Ohkwari'. Ne'e tsi sotsi tahatonhneke' ne Ohkwari wa'thohe'nrehte' wahenron', "Wa'kiheye'ki' wahi' nii onen. " Ne ki, yaken, sahatirihwatshenri' etho ok nikon wahateryen'tatshenri' ne tontahenni'tsyonhkwahkwe' Onhwentsya'ke yonsonhkwari'takwenhtarane'.

Tanon onen Erhar, yaken, wahohsere' ne'ne Kwiskwis. Tsi niyore sahohsere' sahona'tshari'kho'nne' ne Kwiskwis. Etho'ne onen sahateko' rahsterihste'nne' ne rattokha'kowa Tsitsho.

Etho nikakarehs.